واضح رہے کہ آنکھ سے بہنے والامادہ اگرخون، پیپ یاپیپ نُماگدلایاچکنا نہ ہو،بلکہ عام پانی کی طرح صاف ہوتوایسے مادہ کے پاک یاناپاک ہونے سےمتعلق شرعاًیہ تفصیل ہے کہ اگروہ مادہ آنکھ میں ہونے والے کسی زخم یادانے کی وجہ سے آنکھ سےنکل رہا ہے تووہ ناپاک ہےاوراس سے وضو بھی ٹوٹ جاتا ہے ،لیکن اگر وہ کسی زخم یادانے کی وجہ سے آنکھ سے نہیں نکل رہا بلکہ محض آنکھ کی سوزش یالالی کی وجہ سے یا کسی اور وجہ سےنکل رہاہےتووہ پاک ہے اور اس کے نکلنے سے وضو پر کوئی اثر نہیں پڑتا۔
آشوب چشم جسے عرفِ عام میں “سرخ آنکھیں،گلابی آنکھیں یاآنکھیں آنا”کہا جاتا ہےکے متعلق ڈاکٹر حضرات سے استفسار کرنے پر معلوم ہوا کہ اس بیماری کی وجہ سے آنکھوں میں آجانے والے جراثیم سےآنکھوں میں موجود بیرونی پرت انفیکشن یا الرجی کا شکار ہوجاتی ہے،آنکھیں سرخ ہوجاتی ہیں اورآنکھوں سے پانی نُما مادہ یعنی آنسوں اندرونِ جگہ کے سکڑنےکے باعث کثرت سے بہنے لگتے ہیں،عام حالات میں ابتدائی طور پراس سےآنکھوں میں زخم نہیں آتا ،البتہ بعض اوقات جب مریض بروقت مناسب علاج نہیں کرتاتویہ انفیکشن بڑھ جاتاہےاور اس سےآنکھوں میں زخم بھی ہو جا تا ہے ، اورپھر پیپ یا پیپ نُما مادہ بھی بہنا شروع ہوجاتا ہے۔
مذکورہ تفصیل کے مطابق اس بیماری سے عموماًآنکھوں میں کوئی زخم نہیں آتا اورپانی نُما مادہ محض آنکھوں کی سوزش ،الرجی یاکسی انفیکشن کی وجہ سے بکثرت بہتارہتا ہے،چونکہ یہ ایک طبی مسئلہ ہے جس میں ماہرین طب کی رائے معتبر ہے،اس لئےمذکورہ معلومات کے مطابق شرعاً یہ پانی پاک ہےاوراس سے وضو پر کوئی اثر نہیں پڑتا۔
البتہ اگرکسی کی آنکھ میں یہ انفیکشن اس قدر بڑھ جائے کہ آنکھوں میں زخم بالکل واضح ہوجائےیا کسی مریض کو خود یہ یقین یاغالب گمان ہویاڈاکٹری معائنہ سے ثابت ہوجائے کہ اس انفیکشن سےاسکی آنکھ میں زخم ہوگیاہے اور یہ نکلنے والا پانی آنکھ میں موجود اسی زخم کی وجہ سے نکل رہا ہےیاآنکھ سے نکلنے والا مادہ پانی کی رنگت کی طرح صاف اور رقیق نہ ہوبلکہ خون،پیپ یاپیپ نماگدلایاچکنااورگاڑھا ہوتوایسی صورت میں وہ مادہ ناپاک ہوگااوراس سے وضو بھی ٹوٹ جائےگا،تاہم ایسی صورت میں اگر یہ مادہ کسی ایک نماز کے مکمل وقت آنکھ سے مسلسل اس طرح بہتا رہاکہ وہ ایک فرض نمازپڑھنے جتنا وقت بھی نہ رکاتو ایسی صورت میں ایسا شخص معذور کے حکم میں ہوگا یعنی ہرنمازکاوقت داخل ہونےپرایک دفعہ وضو کر کے وقت کےاختتام تک اس وضوسےجتنی چاہےنمازیں پڑھ سکتاہے،فرض ،نفل،قضاءاورتلاوت قرآن وغیرہ کر سکتا ہے ، اگرچہ اس دوران وہ عذرجاری ہو۔